عيد ‏الحب❤️

 اليوم بدأ كالتالي.......
🖤:مش ناويه تحكيلي مالك.... بقالك مده متغيره ومش فاهمه جرالك ايه!
❤️: مانا زي منا بتقولي كده بس ليه؟
🖤:لون وشك بقي يتغير كل ما تشوفيه مش كان مجرد زميل
ايدك بقيت بتترعش من سلامه ليه؟
❤️:مين ده قصدك على مين وبتغمزيلي كده ليه...
🖤:متحكيش ياستى بس مش بعد اكتر من عشرين سنه مع بعض مش هفهمك وهفهم عينيكِ واضح قوي مالك من غير ما تقولي...
❤️:صدقيني مفيش حاجه وانا من امتي بخبي عليكي!
🖤:انتي مش بتخبي انتي للاسف بتكابري
❤️: بكابر!!! لا دانتي فاهمه غلط خالص مين ده عشان يجي ف بالي مانتي عارفه انه كان مصاحب كذا واحده يعني ماهو على ايدك كنت باجي احكيلك وكنت بفرحله يعني هحبه ازاي انتي بتقولي ايه!!
🖤:لسه برضو بتكابري ومصممه تنكري بس اللمعه اللي ف عينيكي فضحاكي قدامه..
❤️: بتقولي ايه قصدك انه فهم؟؟؟؟؟؟
🖤: قلقتي ليه مش هو مفيش حاجه برضو!
❤️: بطلي غلاسه بقي يعني..... لفيت وقعدت قصادها 
انا خايفه بس يكون فاهم اني معجبه بيه ولا حاجه وانتي عارفه طبعا اني مبحبوش ولا حاجه دانا بعتبره كمان اخويا...
🖤: اخوكي طبعا اوماااال
❤️: برضو بتضحكي عليا مفيش فيكي فايده انا مش هحكي معاكي تاني وغلطانه اني بتكلم معاكي
🖤: متتقمصيش بس مش انتي بس اللي عينيكي فضحاكي هو كمان باين عليه انه واقع ع الاخر..
❤️: أحلفي كده هو بجد باين عليه؟!!!!
🖤: الله الله ياست ايه الابتسامه اللي اكبر من قطر العالم ده..... لا واضح ان مفيش حاجه فعلا وانه زي اخوكي بالظبط
❤️: هكسر المكتب ع راسك لو منطقتيش وبطلي هزار ردي ع قد السؤال هو باين عليه بجد؟
🖤: خلاص يا ست القماصه مش ههزر اه ياست باين عليه يعني هو حد بيجيب هدايا فخمه اليومين دول كده لواحده زي اخته؟
❤️: طب ما يمكن بيجيب لكل الناس وعادي
🖤: كل الناس ايه ياست فيروز ده بطل يكلم البنات كلهم ومش لازق لحد غيرك......ايه ده انتي هتسرحي بقي وتلعبي ف شعرك لا انا الحاجات دي غلط ع سينجل زييا انا ماشيه
❤️: استني بس خليكي شويه انا عايزه اسمع كلامك..
🖤: شوف كلامي بقي حلو دلوقت بعد ما كنت دبش ومش بعرف اتكلم  اه من البناااات وعمايلها ...... ع العموم انا همشي دلوقت وابقي سلميلي على........ 
❤️: على ايييييييه عشان افتح راسك حالا......
🖤: اخوكي ياستي هو انا قولت حاجه وهستناكي بالليل ومتتاخريش زي كل عيد ميلاد وحياتك الا المرادي والبسي الطقم اللي اخترته عشان ذوقك وحش علفكره.
❤️: ما اهو اكيد وحش والا مكونتش صاحبتك يا دبش امشي
❤️: استني استني خدي هديتك من دلوقت و كل سنه وانتي طيبه.... هاجي ومن بدري ومش هتاخر زي ما قولتي متقلقيش
نزلت بعد ما كلامها اللي خلاني طايره طلعت دفاتري وبدأت اكتب:

ليه القلب بيدق فجأه لما بعدى من قصاد حارتهم
ومن امتي بقيت بحب وبزور جارتهم؟
تصدقِ بطلت اخاف حتي من حتتهم
دانا حتي اتصاحبت علي كلاب سعادتهم
طلعت فاكهتهم حلوه ومش مُره مانجتهم
وقت اما اشوفه بيقيد ف قلبي نار جهنم
معقوله ده يطلع حب ولا ده كله هيطلع وهم!
.....
من امتي قلبي رجع من تاني يدق؟!
ومن امتي صوتي العالي هِدى و رق!
مش كنا قفلنا الباب ليه فتحنا لما دق؟
ليه رجعنا نكتب تاني مش كنا قطعنا الورق!
مش اتكوينا بالحب اللي وجعه أقوى من وجع الحرق
فتحتي الباب ليه عشمانه برضو يكون فيه فرق!
اه عشمانه وقلبي المرادي قالي انه وثق❤️
....
مكونتش قادره اكتب كلام اكتر وازود فيه كل اللي كنت حساه اني مش عايزه ابذل مجهود او حتى اعبر عن مشاعري لا قدرت احكي لصاحباتي ولا قدرت اكتب عنه كتير وكأن الاحاسيس كانت كتيره جدااا على قلبي اللي عمره ما حس بكده ناحيه حد كل القصص اللي عشتها مكنش ينفع نسميها قصص او حب.... قومت من مكتبي وفضلت ع السرير باصه للسقف ومشغله جنبي فيروز الحقيقيه أصله بيحبها وانا بحب اي حاجه هو بيحبها وبحب اي تفصيله ممكن تجمعنا وبحب صورته اللي  قدامي طول الوقت...
بقيت مستغربه من نفسي جدا ومن التغيرات اللي حصلت ازاي بقيت بحبه كده وازاي مشاعري مره واحده اتبدلت ماهو طول عمره قدامي وكنت بشوفه زيه زي اي حد...
مش يمكن عشان اليومين دول عيد الحب وده حرمان جوايا واهو بيطلع خصوصا اني مبتعاملش مع ولاد غيره ومعرفش حد غيره..... يمكن عشان كده مشاعري متغيره ويومين وهرجع لعقلي من تاني وهو يمكن اهتمامه ده فراغ عشان بقاله فتره مرتبطش باي بنت وهو مكانش متعود يبقي سينجل قبل كده بس الكلام اللي قالته صاحبتي شككني فيه وف نفسي معقوله احساسي صح! طب ازاي هتاكد من كلامها مش يمكن لسه بيشوفني صاحبته اللي بيحكي لها عن حياته وبس صحيح تصرفاته اتغيرت بس اتأكد ازاي!!!
نفسي اسأله لكن بخاف... نفسي اتأكد أن عنده نفس الاحساس
الواضح أن النوم غلبني زي حبه بالظبط مفوقتش غير علي رنه التليفون...
🖤: انتي فين ازاي لسه مجيتيش لدلوقت؟؟؟
❤️: انا اديني داخله عليكي اقفلي عشان اجيلك بسرعه يلا..

كان لازم اكدب ازاي انام ومكونش موجوده اول واحده دانا اقرب صاحبه ليها..... قومت زي المجنونه بلبس من حظي انها اختارتي اللبس وجهزتلي كل حاجه قبل ما تمشي والا كنت قعدت اعيط دلوقت.... لبست بسرعه ونزلت جري واول ما نزلت لقيت اخويا مستنيني وبيسألني اتاخرتي ليه؟ وكانه حاسس اني متأخره وان عندي مشوار من كتر توتري نسيت اسأله انت عرفت منين ولا ازاي عرفت انا رايحه فين!
اخيرا وصلت وسبت اخويا يلف ويمشي براحته انا كنت مستعجله وخايفه يطفوا الشمع من غيري دخلت العماره علطول ولقيت انوار وشموع للحظه استغربت كل ده عشان عيد ميلاد!
ده لو فرحها مش هيبقي كده وايه ده صوت اغاني عاليه هما جايبين دي جي ولا ايه ؟ كنت شبه بتكعبل بس اخويا من ورايا سندني... وسألته انت ممشيتش ليه وطالع عيد ميلاد صاحبتي ليه وهو كان بيضحك عليا ويقولي لزمته ايه الكعب وانتي بتتكعبلي مننا كده هيبتك هتروح
وهنا زادت الصدمه......
اول ما دخلت لقيته ف وشي ماسك ورد....
اتكسفت جدا المفروض اسلم عليه بس اخويا جنبي هو صحيح اخويا حنين بس انا خايفه يبان عليا حاجه انا هتعامل على أنه زميل عادي بس منه لله وشي اللي بيقلب طماطم ده كل اما اشوفه........ مستنتش اخد قرار وهو اللي جه من نفسه الغبي مش شايف اخويا واقف جنبي ولا ايه
انت بتعمل ايه هنا انت معزوم اااااه معرفتكش اخوياااااا..... قبل ما اكمل كلامي قطعني ف ثانيه
حلو الفستان عليكي انا برضو ذوقي حلو!
ذوقك ايه ده بتاعي ده حتي اخويا هو اللي اداني تمنه فاكر انت يا اخووياااا صح.... كنت بحاول اقول ايه كلام اخبي بيه خضتي هو فعلا مجابليش الفستان ده لو قاصد يفضحني مش هيقول كده
مانا عارف بس انا اللي اختارت تلبسيه انهارده انتي عارفه اني بحب الأسود عليكي....
لا لحظه بس فهمني اختارت ايه وعملت ايه ده اللي اختارتهولي صاحبتي وفعلا اتخضيت من كلامه ومن وجود اخويا اسود ايه اللي بيحبه عليا الكلام ده مينفعش يتقال هنا ودلوقت وحسيت ان هتحصل مصيبه....... هي حصلت مصيبه فعلا بس من نوع مختلف.........
طلعت تمثيليه وانا البطله فيها من غير اي دور او فعل او كلام كل الحكايه ان قلبي وقف ف اللحظه دي ووقف معاه الزمان والمكان.... يمكن لما بفكر انا هعمل ايه ف لحظه زي دي كنت هقول اني هبقي فرحانه وبضحك وبرقص وبتصور وهكون مبسوطه جدا بالمفاجاه دي بس مكنش ده اللي حسيته...
للحظه كل حاجه وقفت ومقدرتش  استوعب وقتها اي حاجه كأن عقلي اتجمد وصوابعي كانت اتجمدت فعلا من كتر الايرور اللي حصل ف دماغي مفوقتش غير وانا ف حضنه ولابسه خاتمه وبيرموا علينا ورد وعيونهم حوالينا وصوت زغاريد انا مش قادره اسمعها يمكن محسوش اني مبسوطه بس هو كان عارف اني مكونتش معاهم ع الارض انا للحظه وصلت لجاره القمر ومسمعتش اي صوت غير دقات قلبه وانا فحضنه كان احساس مختلف وفرحه من نوع مختلف فرحه كبيره على قلبي اللي دقاته كانت مسموعه وهو بيضحك جوايا ويسألني هو ده بجد هو تاب على ايدك فعلا وهيبقي ليكي ف النهايه؟!
الف احساس دخل قلبي بعد سنين كان فيها متجمد ومركون ورافض يحس ويدوق الحب لكن اكتشفت انه كان مستني الوقت والشخص والاحساس يتفقوا ان ده وقت الحب❤️✌️
Happy valentine's day❤️