‎من ‏سنه ‏فاتت ‏إلا كام ‏يوم

من سنه فاتت الا كام يوم
انا قولت هحب حياتي وهبطل لوم
وهدخل ناس تانيه الدايره
مش هفضل تايهه ولا حايره
الحب قرار وانا واخداه
حطيت plan للي انا عيزاه
وبدأت اصلي اني انا الاقيك
وبدأت افتش ف دفاتري عليك
الحب قرار وانا قررت اني هلاقيك...
وهدور عنك ف عيون الناس
مش هفضل وحدي ف وسط الناس
مش هيفضل قلبي وحيد محتاس
ده غيابك طال يا ابن الناس
.....
من سنه فاتت الا كام يوم
اصحابي...
اقرب ما يكون
خطه ورسمهالي الكون
سند ودفا ولعب وجنون
كانت الخطه اني اركز معاكوا زياده
واديكوا الحب اللي ميخلينيش يوم اهون
عيشنا فتره طويله فيها ضحك
وعيشنا اكتر حزن ودموع
كانت الخطه اني هنفرح سوا
وهمسك ليكوا الشموع
......
من سنه فاتت الا كام يوم
اخواتي....
قررت اني مش هكرر نفس الغلطه معاكوا
حبيت اعيش دفا واحضان وأمان وياكوا
تطلعي دكتوره تطلعي فنانه انشالله حتى تكون سباكه
انا هفضل اتمني اكون سبب الضحكه والابتسامه
يمكن تشوفوني هبله اومجنونه
تصرفات بايخه لطفله ف سنه اولى
ويمكن دلوقت متفهموش الفوله
لكن لما هتقسي عليكوا الدنيا
مش هيبقي فاضلكوا غير الزرعه والذكرى الاولي
.......
من سنه فاتت الا كام يوم
بابا ❤️
اخدت قرار انك تشاركني السنادي
وهبطل خجلي وكتمه انفاسي
شغلك شغلي وتعبك تعبي
وحمولك على اكتافي
حضنك لينا واحساسك بينا ده وحده كافي
العالم كله قسوه من غير حضنك الدافي
......
من سنه فاتت الا كام يوم
كان في الف صوره متخطط ليها تتحط ف البوم
كانت في قصيده هتتكتب كل يوم
كان في امل حالف هيدوم
ولأن القدر ليه كمان خططه
فهعيد نفس القصيده بعد سنه الا كام يوم
واتمنى اللايحه المرادي تظبط.. اتمني الاقيك... اتمني عمري ما اهون... اتمني افرحكم.... اتمني اكون سندك... اتمني اكون احسن ما يكون... اتمني السنادي ميعاكسنيش الكون

2021 اهلا بيكي و زدينا فرح كل كام يوم