حب ‏وراحه ‏وموده ‏❤️

انا اكتشفت ان كل يوم بغير اختياري لمواصفات شريك حياتي
كل يوم بتتغير خططي واحلامي واهتماماتي..... حاسه اني بكتشف نفسي اكتر وبتاكد كل يوم ان محدش من اللي اعجبت بيهم ف اي وقت كان مناسب ليا او شبهي واللي اتمنيته قبل كده لو رجع بيا الزمن مش هختاره دانا ممكن كمان اهرب انا فعلا بسأل نفسي ازاي طلبت الشخص ده ف يوم من ربنا وازاي زعلت منه انه مستجابش لطلبي مش هقولك اني كنت مش شايفه العيوب والمميزات بس هقولك اني كنت بحدد الشخص بمقاييس البشر من حيث الشكل والمظاهر الاجتماعيه والعيله واللبس والذوق والنجاح بس ولا مره سألت نفسي انتي هترتاحي مع الشكل ولا العيله ولاالمظاهر ولا كل المقاييس الغبيه دي....

-كلامك ده كبير وعميق عليا ياست وانا مش فاهمه بتقولي ليه دلوقت ايه اللي غيرك دلوقت...

*ارتحت انا اول مره ارتاح كده اكتشفت ان كل حاجه مش مهمه زي اني اكون مرتاحه وقلبي يكون مطمن بالشكل ده

-ااهااااا ده شكله عجبك بقي ووقعتي ياست بس انتي مش شايفه انه مختلف خالص عن أحمد عز ولعيبه الكوره اللي معلقه صورهم ف كل حته دول؟ راح فين طموحك اللي تعبنا معاكي ياهانم...

*مانتي اكتر واحده بتقوليلي ان الواقع هيبقي مختلف ومش هلاقي الناس دي ع ارض الواقع وان لازم ابص للي قدامي واللي موجوده فعلا وانا بعمل كده....

-وانتي مش هتسمعي كلامي غير دلوقت مانا كلامي ده اتعاد 100 مره مع كل واحد اتقدملك هتسمعيه دلوقت عشان واحد متقدملكيش ولا قالك انه معجب بيكي اساسا!!!!

*مش مهم خالص يقول المهم اني اخترته واني لقيت نفسي معاه انا علطول بتقفل من اي ولد بسرعه يعني مش ممكن اتكلم يوميا مع ولد مش ممكن حتى يبقي في ولد ثابت ف حياتي ويبقي مطلوب مني ارد عليه أو اتكلم معاه ف مواضيع بحس نفسي مخنوقه دايما لو اتكلمت مع حد وبحس بالغربه انما معاه انا مش حاسه بالغربه انا بدأت افهم ليه البنات بتكتب على صور حبيبهم وطني وليه الولاد بتكتب رجعت مطرحها هو فعلا بيت ووطن ودفا وكل حاجه حلوه بتمنى ربنا يكتبهالي.

-ياريته يسمع كلامك عنه مش هيصدق نفسه ان القمر بنفسه حبه الواد ده امه دعياله عشان ترفضي كل الناس دي وتتقفلي من كل الولاد عشان تفتحيله قلبك ف النهايه بصي بقي انا هبدا اغير منه خلاص وشكلي هبقي حماته التانيه...

*يسمع منك ربنا وتبقي حماته بجد ويطلع من نصيبي الحلو..

-هو انتي قلقانه لا ميحبكيش ولا ايه؟

*انا مش قلقانه انا خايفه ومرعوبه بجد على قد مانا برتاح معاه على قد ما بخاف بعد كل شات وكل مقابله كل الحب وكل الراحه والفرحه بتتحول لخوف كبير انا اتعودت لما ازعل منه اقوله وهو عمره ما نام غير لما يصالحني الا خوفي وزعلي من انه يكون مبيحبنيش مش قادره اقوله.....

قطعت كلامي بسرعه وقالتلي تقوليله ايه بس اوعي تعملي كده لا يحس انك مدلوقه عليه وساعتها مش هيحبك وهيتهرب منك ويتكلم عليكي مع كل الولاد وكله ما هيصدق يتكلم عليكي انتي بالذات عشان كل اللي رفضتيهم ورفضتي حتى تردي ع مسدجاتهم......

منكرش انها بتتكلم صح بس انا وقتها هزيت راسي على كلامها  وسكتت ملقتش رد غير أني انهي الحوار ده عشان هسمع كلام للاسف صح بس انا مش قده
من وقتها بسأل نفسي انا هعمل ايه وهختار ايه راحه قلبي ولا راحه بالي والمبادئ اللي تعبت على ما كونتها مش معقول بعد كل السنين دي والتجارب الوحشه اللي شوفتها والسد اللي بنيته حوالين قلبي ناحيه كل الولاد هيتهد كده عشان واحد....
صحيح انا عايزاه ومش عايزه غيره بس مش قادره اجازف واتجنن حاسه اني متكتفه وخايفه...
في البنات بحسها بتتخلي عن جزء من كرامتها او مبادئها او أخلاقها عشان الشخص اللي بتحبه او بتتمسك وتقبل بالصالونات بس انا صعب عليا جدا اتخلى عن كل اللي تعبت فيه عشان حد وصعب عليا اسيبه واقبل بالصالونات هو ليه يارب الموضوع ميجيش بسهوله ليه هو ميتكلمش وابقي حافظت على كرامتي وصورتي ف عينه واكون اخدت اللي انا عيزاه وهو التاني مستعد ماديا انه يرتبط وعنده وظيفته وعيلته وعيلتنا مناسبين لبعض مفيش مبرر لسكوته غير انه محبنيش وانه مجرد إعجاب وحابب يتكلم ويتسلي ع الفاضي انا لازم احسم الموقف ده واقفل الباب على كده مينفعش ادي رصيد المشاعر اللي جوايا لحد هيرميه ف الارض لازم ارجع ابني السد واقفل الباب تاني..

-انا مش عارفه اقولك ايه انا كنت مبسوطه انك اخيرا مشاعرك المتجمده دي اتحركت بس كمان خايفه عليكي ع العموم هو لو بيحبك هيكلمك بدل المره عشره مش مره ويسكت

*انا خلاص قفلت معاه وقولتله اني مكتفيه باصحابي ومش عايزه اصحاب جداد انت زميل جدع ووقت ما تعوز مني مساعده هكون موجوده ولو عوزتك اكيد هكلمك بس اننا نتكلم 24 ساعه ده مش مناسبني انا اسفه...

-طب وهو رد قالك ايه؟اتضايق ولا استوعب كلامك وفهم!

*مردش للاسف مردش كان نفسي يقول اي حاجه يقولي انا متمسك بيكي او اني مش هقدر أوقف كلام معاكي انا اتعودت عليكي بس هو شكله خد الكلام على كرامته واختار يسكت.... كان نفسي يختارني حتى لو انا مختارتوش..... للاسف وحشني

- تعالي ف حضني وبطلي بكا بلاش الدموع دي انتي عملتي الصح صدقيني وهو لو كان متمسك بيكي مكانش سكت اديكي عرفتي انك صح هو اثبتلك ده بصمته...

*انا هانت عليا نفسي وصعبت عليا روحي قوي كان نفسي يختارني......

-منه لله اللي تعب قلبك معقول بعد كل صبرك ده ترجعي تتوجعي تاني كان عندك حق تقفلي على قلبك كل السنين اللي فاتت دي ربنا هيعوضك بالاحسن متقلقيش ومتبكيش تاني خليكي قويه...

*انا مكونتش عايزه الأحسن انا كنت عيزاه هو....

-طب امسحى دموعك يلا عشان مامتك متحسش بحاجه اكتر ما هي شاكه وسألتني مالك وانا قولتلها مالها وعملت نفسي مش عارفه حاجه وقولتلها اني هاخدك وننزل شويه يلا قومي البسي ومش هترفضي مينفعش اطلع اقولها انك مش نازله هتشك فيكي اكتر وانتي عارفه مامتك مش هترتاح ولا هسيبك غير لما تعرف مالك....

صحيح مكانش عندي طاقه انزل او اتحرك بس خوفي من اسئله ماما وان معنديش اي طاقه ليها ولزنها خلاني انزل واكتشفت اني فعلا محتاجه الهوا يخبط في عينيا اللي مش قادره تفتح من كتر الدموع كنت محتاجه افضل باصه للبحر وهواه يعاكس شعري ويطيره حواليا....

-الساعه وصلت خمسه والمفروض نرجع البيت بقي ولا انتي حبيتي القعده هنا يلا كفايه وبكره هنطلع تاني.... ده كان كلامها بس انا مكونتش قادره اتحرك او اقوم من مكاني مكونتش شبعت من البحر ولسه كل اللي جوايا مطلعش وصممت انها تسيبني وتروح لمعادها وطمنتها عليا

*فضلت ساعه كمان لا بعيط ولا بتكلم ولا بفكر كنت بريح دماغي وقلبي من الدق اللي حاصل فيهم كنت محتاجه الساعه دي اللي هفصل فيها عن كل حاجه وعينيا متشوفش غير صورته بتغرب مع الشمس وقت ما الدنيا بدات تضلم ومكانش ينفع اقعد وحدي اكتر من كده وقتها تليفوني رن وكان هو
قلبي من الخضه ضحك جوايا ومقدرتش مردش عليه..

*الو
:موحشتكيش؟
اتخضيت من سؤاله وعقلي بيقولي ردي عليه رد ناشف ومتحنيش بس قلبي وقتها سكت كل كلام العقل وقرر هو اللي يدير الحوار بينا
*وحشتني اكتر من اي حاجه ف الدنيا
:امال ليه قررتي تبعدي عني
*خوفت اتعلق بيك اكتر من كده وتبقي سبب جرحي
:وانا من امتي خليتك تخافي مني لدرجه اني اجرحك؟
*صدقني انا عمري ما اتطمنت مع حد زي ما اتطمنت معاك
:وانا عمري ما فراق حد أثر فيا زيك ياعمري كله
*انا عمرك بجد!
:لفي وبصي وراكِ طيب
فجأه لقيته قدامي اتخضيت واتكسفت وارتبكت وحسيت مليون احساس مقدرتش غير اني ابص ف الارض من خجلي مكونتش حتى عارفه اسأله انت عرفت مكاني او جيت هنا ازاي وقتها كنت طايره بجد....
:بقي يهون عليكي تسيبيني وتقوليلي مش عايزاك ومش عايزه اصحاب وكل الكلام السم اللي قولتيه ده...
مش هتردي عليا ماشي بس حتى بصيلي وكفايه كسوف انا مسامحك...
مكونتش عارفه اتكلم او ارد او ابص لعنيه حتى...وساعتها قطع الصمت اللي بينا وقالي طب مادام مش هتردي ولا هتبصي اسمحيلي انا بقي اللي هتكلم وشال شعري من على وشي ورفع راسي عشان ابصله  وقالي انا مينفعش اخليكي تخافي مني يا كل عمري انا عمري ما هلاقي زيك ولا هحب زيك
انا بعشق صوتك وكلامك وشكلك وروحك.... انا مطولش ان القمر ده يبقي من نصيبي وان القلب اللي صوت دقه واصلني ده يبقي ف حضني ف يوم من الايام انا خوفت متقبليش بيا واني مطمنكيش وانك تحسي بالغربه معايا وتبعدي عني عشان كده اتاخرت مع اني حاولت اطمنك بس البعيده غبيه لازم اقولها بالحرف انا بحبك وانا بحبك ياهانم وبموت فيكي يا اللي تعبتي قلبي ومتمناش شريكه لحياتي غيرك ومش هسمحلك تبعدي تاني عني مفهوم وقرب مني وسكت وسابني لحيرتي بس عينيا فضلت تسأل عينيه
هو انت قولت بحبك بجد!!! انا ف حقيقه ولا بحلم كل الكلام كان ف بالي ومش عارفه انطق كنت محتاجه استخبي منه استوعب اللي اتقال وهو حس بحيرتي وخباني من عينيه ف حضنه اللي مفارقنيش غير لما اطمن وسمع مني اني كمان بحبه❤️

طلع بجد ممكن ربنا يطبطب على قلوبنا ويجيلنا اللي عايزينه واللي شبهنا من غير ما نخسر مبادئنا وقراراتنا ولا نتغير ❤️
مينفعش نستغني عن اللي راحتنا معاه وانا وهو قبل ما يبقي فيه بينا حب فيه بينا موده واحترام وراحه وأهم حاجه اني مطمنه معاه وهو مطمن معايا ومرتاحين وقلوبنا بتشبه بعض ❤️
يشهد البحر على حبنا اللي بدأ ❤️🍯

#لونا❤️