كان نفسي ف أم
كان نفسي ف ام
كان نفسي ف ام تكون موجوده وحضنها بيضم
كان نفسي تخبي مصايبي وتشيل ويايا الهم
تعاقبني بحنيه وورايا بسرعه تلحق وتلم
تحضني وتسمعني وتصدق ف حلمي الوهم
يكون سنها زيي او تكون حجه مكانش مهم
عمري ما قولتلهم ان امنيه عيد ميلادي عوض للأم
بيرعبوني لو قالوا نجاحك سره رضي الام
واي يكسرني ويبكيني غير زي دا هم
وايه يقلقني ويخليني من غير حب وحضن ودفا الا انعدام وجودها....
وايه يخبيني من العالم جوايا لو بيتي مفهوش دفاها وصوتها.........
وايه يكون الحضن اللي هجريله لما الدنيا تتقلني بقيودها.....
انا لسه جوايا رضيع بيصرخ لو مش بين ايديها وكفوفها....
..... كان نفسي ف ام
تكون ليا الصاحبه اللي متبعنيش
وتكون هي حبيبي اللي محبنيش
واشكرها كل يوم انها كانت سبب اني اعيش
كان نفسي اقولها غير رضاكي ياامي ماليش
مش تسالي طيب ايه احوالي وازاي بعدك بعيش
كان نفسي اشوف ضحكتك لما اجبلك يا أمي النيش
اكيد بتحبيه وزيّ بتحبي نوع معين من العيش
كان نفسي ادور عليكي والاقي اجابه غير مفيش
مش موجوده ومش هتضمك فمتدوريش
مالهاش عوض ولا بديل فمتتعبيش
مكان ما تكون اكيد نفسها انك تعيشِ
زهقت من كلامهم يا أمي مبيفهمونيش
ازاي بعدك هكمل وازاي هقدر اعيش
مش هتقري اشعاري وتسمعِ معايا الدرويش
ازاي بيطلبوا مني يا أمي أنِ مبكيش
كان نفسي ف ام
كان نفسي ف ام تدعيلي وتسهر معايا الليل
تحضني ف وحدتي ونتمشي قصاد النيل
تفهمني من عيني وتكشف همي اللي هد الحيل
تفرح بضفاير شعري وراسي على كتفها تميل
تبص لوشي العادي وتقولي ماشاء الله جميل
اتحب ف عيونها وتستاني لحد الليل
تقربلي ولو حتى بينا جيل وجيل
تحكي للناس عني واشوفني ف عيونهم جميل
يمكن كلامي ده لا يتسمع ولا يتشاف
تبعدنا المسافات ويختلف العقل والاهداف
لكن هنتفق ان مفيش طفل من غير امه مش بيخاف
ولو شايفينِ كبرت فانا جوايا طفل مهزوز ف غيابها وبيخاف
بيقولوا الام دفا وانا منابنيش الا الجفاف
الكل رسمه بالألوان وانا لسه يا امي قلمي جاف
كان نفسي تكونِ ف ضهري ومكونش كده شفاف
كان نفسي ف ام
اكون فخور بيها واوريها لكل الناس
وحدها تلبسني الطرحه وتزغردلي قصاد الناس
مين بعدها يزفني ومين هيطمن جواه كل احساس
كان نفسي اكون عادي لكن ف غيابك بقيت حساس
خايف ومهموم وحابس نفسي بكام ترباس
كان نفسي ف ام قبل ما انام لازم راسها تتباس
اكون سند ليها ولرجلها مداس
كان نفسي اطمن بدل كتمه الانفاس
مش هتيجي يا أمي تشوفيني وانا ف غيابك محتاس
كان نفسي ف ام....
اشرب وياها الصبح القهوه
توصيني اكون زيها كده صلبه
تخبطِ على راسي وتقولي كفاياكِ مناهده
تسندِ ضهري لما يتعب من المعافره
تحميني من غدر الظروف اللي بتيجي على سهوه
نتخانق لما تعملي يا أمي الباميه
قولتلك مبحبهاش ولا مفيش فايده
تقوليلي اصحابك هيجيبولك الكافيه
تعرفيني لما اكدب وتعاقبيني من غير قسوه
حضنك بس يحميني لما العالم يتملي بالقسوه
اعمل حسابك ويايا ف القهوه!
كان نفسي ف أم
تكون الضحكه وسط بيت كئيب ومضلم
تشدني ع الارض لما تشوفني بحلم وبتوهم
تبكي على جرحي وتكون ايديها هي البلسم
تعرف مصايبي قبل ما احكيها وكانها بتنجم
تشوفني وانا فرحانه ف عينيها تتبسم
هتيجي يا أمي ولا هفضل كده كتير بحلم!
كان نفسي ف ام
نتخانق ع نضافه البيت اسبوعين قبل العيد
تلاقيني متضايقه ف تجبلي لبس جديد
تنده على ابويا وتقولي بوسِ الايد
وتيجي من وراه تديني فلوس زياده للعيد
بصي ف غيابك البيت تعب من التنهيد
ف غيابك ازاي اقول على يوم انه عيد!
البيت بحطه ايدك ومفهوش اي جديد
طولتِ ف البعد هو مكانك يا أمي بعيد؟
من امتي بتغيبِ مش بينا يا أمي مواعيد!
انا لسه ف انتظارك ورافضه اي تجديد
كان نفسي ف ام
تدعيلي الصبح الاقي كل الحب والخير
اول ما اقولها انِ بحب اشوف ف عينيها انها بتغير
تحكي لكل الناس عن جمالي وان شعري حرير
وانا مش جميله يا أمي بس انتِ حضنك كبير
بفرح من قلبي لما يقولوا ان الشبه بينا كبير
مش هتيجي يا أمي فيه جوايا كلام كتير
كان نفسي ف ام
احكيلكم عن فرحتها بأول وظيفه خدتها
وحشني كلامها انِ انا الهديه اللي جاتلها
لسه فاكر يوم غيابك وحاسس بالالم من وقتها
وحشوني يشاوروا علينا ويقولوا دي بنتها
حتى وحشني اشاركها ف همها
كان نفسي ف ام....
تعليقات
إرسال تعليق