شط اسكندريه
المطره نزلت على صوت فيروز من يومين
لأول مره تكون دموع السما اغزر من دمع العينين
لازال الشتا بارد رغم اننا وصلنا لشهر اتنين
جف الكلام وقتها والشعر م الدواوين
يكفينا ندعي باللي يتمناه القلب والعين
بنحب لسه الشتا رغم برده اللعين
......
يجوز بكره يكون في بدايه جديده
يجوز ننسي وقتها القلق والحيره
يجوز الورد يملا الهوا بالريحه
هسرد شعري ساعتها بمليون شكل و تسريحه
والاوضه الضلمه هتبقي وقتها فسيحه
والرمش هيتكحل ف مرايته بضحكه خفيفه
.....
صوت فيروز هيتحول لصوت ورده
عصافير الأمل هترسملي كل يوم بسمه
هصدق الحلم ولو الكل شافني واهمه
هتمسك ببكره واخطف م السما نجمه
هزغزغ الشارع وهعتبره ونسي لو حسيت بالوحده
هفرشلوا من شعري كل ليله واحده
.....
عمرك شوفت ورده حبت ف مره الخريف
انا مش غريبه ولا أحلامي تخاريف
مش زي ما بشوفني ف كلامكم السخيف
لكنه صعب ع اللي زيك يحس بالطيف
بوصفك حكمت اني مش شخص محبوب ولطيف
صحيح القبول مش اختيار بس الراي لابد يكون خفيف
.....
ع الشط واقفه وبرمي ف البحر حلم الليل
من بعده برميلك يا اسكندريه كل هم ع قلبي تقيل
بنادي ع اللي راحوا و اللي فضلوا عليا الرحيل
بفتح قصادك قلبي وبرخيلك القوه والحيل
بسيبلك عيني تاخد منها ولو حتى سيل
بسيب للهوا شعري هل شكلي قدامك لسه جميل؟
......
بيعدي الهوا الصبح على روحي النايمه
ضحك ورمل وشماسي واطفال حافيه
عوم ولعب وشمس بتدفي برود الميه
والباكيه النايمه صبحت ضاحكه رايقه
صحيح ان اسكندريه دوا للروح الهايمه
بتطفي ازاي نار قلبي بروحك الهاديه!
.....
تعليقات
إرسال تعليق