سلام ايديه❤️
ف كل جمله بخبي منك قلبي المفضوح
بهرب من عينيك لا تمس فيك الروح
بخاف لتخاف من حبي وف لحظه كله يروح
بلجم عشانك لساني حتى لو بترقص جوايا الروح
صعب ع اللسان الصمت لما قلبك يقرر انه يبوح
ويعز علي قلبي قلبي اني ابيته كل ليل مجروح
لكن اخاف تمشي وانت العقل والقلب والروح
وراك من غير ما اسألك ناوي على فين تروح
وف نفس الوقت بهرب اخاف لعشقي ريحته تفوح
.....
بحبك ف سلامك وبصه عينك
بحبك ف غضبك وف تنهيدك
وف احلامك وحكاياتك ومواويلك
وقت اما تخاف انا اللي هتشد على ايدك
انا اللي ف بردك بيتك
وانا اللي ف عومك نيلك
قبل ما تناديني هجيلك
ووحدي هيكسرني رحيلك
انا اللي قلبها بيدوب ف سلام ايدك
.....
ميكفنيش الكلام فيك بيوت
انا اللي واصله ف حبك لدرجه الموت
لو كنت يونان كنت انا هبقالك الحوت
وهقفل عليك جوايا لو وصلت للقيود
صحيح ابويا وصاني بعلو الصوت
الطير لو مكانش حر بيموت
ويعز عليا يكون حبي ليك قيود
هسيبك حتى لو ف فراقك هموت
يمكن مش نصيبي أمتلك الياقوت
......
كام مره خدت ناحيتك خطاوي
كام مره سهرتك ف اي كلام وحكاوي
كام مره قولتلك ان كلامك ليا بيداوي
يظهر ان حبك ده جن وانا مخاوي
قلبي بيقوله كل دقيقه انا ليك هاوي
مش سامع قلبي ومصدق كدب كلامي
شكلك مع الوقت بقي قلبك لتعبي هاوي
مبملش منك وبستني اشاره انك ناوي
بحلم بحضنك وبيملاني الكسوف ف سلامي
......
ازاي احكيله ازاي انا رسماه
ازاي ف قربه بصرخ جوايا بهواه
وازاي اوصفله دعايا اني ابقى معاه
معايا وقلبه بيسافر لغيري بهواه
وانا بستحمل ولسه مازلت بستناه
امتي هفوق من كابوس اني مش لمساه
وان روحه بتهرب لغيري رغم اني معاه
ابعد عنه ولا استنى عيني تلقاه
وتفضح قلبي وتحكيله اني عيزاه
.......
رغم اني حرمته مني زمان
وقتها جاني وقالي ان حضني امان
ووحكالي ان مفيش زيه حنان
صدقته وقت اما كان ندمان
قلبي لام عليا كفايه كده حرمان
مع الوقت اكيد حبه هيظهر ويبان
رغم خوفي اديته تاني الامان
لكن كله ظهر الا حبه رفض يبان
هل محبنيش ولا قلبه لسه جبان
......
حبيبي كل حلو الدنيا اتجمع فيه
وقت زعلي وبكايا كان الافيه
رغم عنده وانكاري لحبي ليه
رغم كبريائه بيمدلي دايما ايديه
ووقت برده بيطلب من قلبي يدفيه
ودموعي بتنزل على كفيه
َوحلمي افضل شبطانه ف ايديه
اقفل على قلبه وجوايا اخبيه
يبكي من العالم وف حضني ههديه
......
تعليقات
إرسال تعليق