انا ‏مش ‏وحيده 🖤

ليه خلقتوا جوانا ذكريات بتنهش فينا
وليه علقتوا قلوبنا وعشمتوا كل حته فينا
ليه حلفتوا ان بكره هيبقي لينا
وليه فرطتوا وقت اما مدينا ادينا
ليه الغدر لما فكرنا ان الدنيا هتضحك لينا
ليه دخل جوانا الحزن مش كنا خلاص اتحبينا
مش كنا حطينا نهايه للحيره
ورسمنا بضحكتنا بدايه جديده
ليه الفراق ماسك كده فينا
وليه قلبي مش بيتحب
قلوب راحت وقلوب عدت وانا قلبي شب
العيب فيا ولا  ف قلبي اللي حب
العيب ف كسوفي ولا الخوف اللي ف قلبي دب
كل اما يهل ربيع وافتح شبابيكي ليه الرعد يهب
ليه اسأل نفسي كل صبح انا ليه مش بتحب
اكمني عبيطه وبصدق ف الافلام
الذنب ذنب اللي زرعوا فيا احلام
من غير ما يقولولي انها كلها اوهام
عشموني بفرحه بسرح فيها لحد ما انام
ورافضه تتحقق واهو بتعدي بيا الايام
ازاي دلوقت عايزين ارضى بالمقسوم
ازاي مش مستحملين حتى اني ألوم
طب ليه حلمت مادام الواقع كله هموم
مين السبب ومين يترمي عليه اللوم
قصص الأطفال
سندريلا والامير
ياسمين وعلاء
ولا ريبونزل ويوجين
سعاد حسني وفاتن حمامه
رشدي اباظه ولا كريم عبد العزيز
ازاي اسلم قلبي ف بيعه بعد ما عاش طول عمره عزيز
انا مش صوره تتشاف ولا شكل يتوصف انه لذيذ
انا مش سلعه تتباع ولا طول يتقاس ولا بتعاين بالعين
مش مستوي اجتماعي ولا هيحدد قيمتي غني أو دين
انا شايفه نفسي ملكه ويتقدم ليها الحب والعينين
ولا هقبل اكون بيعه ولو كان الشاري مين
الحياه قاسيه وصعبه وحلوه ومجنونه
فيها دموع وحزن وفيها ضحكه جوه تعبها مدفونه
فيها مرض وفيها شفا وفيها يأس وفيها معجزات
زي ما فيها نهايات فيها كمان بدايات
فيها أحاسيس تستاهل تتحس وتتعاش
فمتقبليش تعيشي عيشه مش بتتعاش
لو كنتي مريضه الف ايد ممكن تقدملك الدوا
والفرق هيوصلك حتى لو قدموها كلهم سوا
ايد معاكي عشان ضميرها
وايد وياكي عشان انتي رفيقتها
ايد ده دورها ودي وظيفتها
وايد بتطبطب على حبيبتها
الف عين ممكن تبصلك وتسالك عن أحوالك
بس مش كل عين بتنزل دموعها بتدعي عشانك
الف حضن ممكن يستقبلك ويساعك
بس مش كل حضن مفتوح بس عشانك
مش كل واحد جالك حبك من قلبه بجد
مش كل كلام بيتقال يتصدق انه وعد
ياما وعود شوفنا بعديها البعد
وياما كلام كتبناه ومالقيناش بعده رد
بنعيش نحلم ونبني ف قلوبنا قصور من ورد
والواقع خريف رغم قوتنا ريحه جوانا بتهد
تعبنا ولخبطتنا ودموعنا اللي مبيشوفهاش حد
بحب احلامي وشايفه انها تستاهل اتعب علشانها بجد
ممكن ميكونش فيه مقابل واعيش وحيده من غير حد
بس مشاعري هتفضل حيه مش هجمد قلبي ف بيعه لحد
لو مين خذلني هخلق انا لنفسي كل يوم وعد

بقلبي وجنوني وضحكتي الغريبه
وشعري صاحب وحدتي كل ليله
هخلق لسفني مرسي وميناء

بدموعي وحيرتي وافكاري اللي ف جوفي
اغانيا وكتبي والمزيكا اللي بتدفي فيا خوفي
هقول للدنيا مش هستسلملك تعالي اهو وشوفي

مش هقبل اتحط ف الدايره المعروفه
فستان وطرحه وصوره ف الكوشه
معازيم وهيصه وفورمه منكوشه
زغروده وفرحه كدابه وأغاني مارووشه
مالهاش طعم الدبله وانا روحي مقفوشه
تمثيليه كدابه وسيناريو بيتكرر
بيزيدونا قيود وفاكرينا بنتحرر
متبقاش حياه لو قلوبنا مش بتتقدر

حتى لو اتأخر سنين فوق اللي عدوا
الحب اللي بجد هيجي ف أوانه ووقته
هيضمني ويعتبرني حته من قلبه
هيبكي لفراقي وهشغل قلبه وعقله
عمره ما هيفرط ولا يكدب يوم وعده
هتبقالي الدنيا كلها فيه لوحده
مش هكون وقتها صوره وشكل وتسعيره
مش هخلق ضحكه كدابه وابتسامه عيره
وقتها هخبيه من العالم وهتملاني الغيره
مش هبات ف قلقي ولا تتعبني تاني الحيره
هيحسسني كل يوم اني بالحب جديره
هيصحي كل حلم ادفن  ويضمد كل جرح وتعويره
هصرخ للعالم بعوضي وهعلن فرحتي لكل الجيره

الحب والخوف والقلق والغيره
مشاعر تستاهل استني عشانها كتير
معنديش ضمان صحيح القاهم
مش واثقه ان الدنيا دي Fair
لكن مش هظلم قلبي ولا هظلم معايا الغير
وان كان ع الوحده انا مش وحيده
وبكتب ف حبيبي كل يوم قصيده جديده
رسماه وحساه وحاسه بقلقه وتعبه وكل تنهيده
خيالي مصاحبني وعمره ما سابني ف ليله وحيده
فانا مش وحيده
ومش هموت لو ملبستش فستان
ومش لازم اقلق من عيون الجيران
مش هرضيهم واحرم نفسي من الحنان
مش هاجي على نفسي عشان ايا مين كان
وهستني اللي يطمني ويديني الأمان
انه مش هيبعد او يخون
وان تصرفاتي مش هتتشاف جنون
هستني اللي ميتمناش يشوف غيري عيون
اللي من قلقه عليا مش بتغمضله جفون
اللي حضنه فيه حب ودفا كل الكون

انا مش وحيده ولا كلامي جنون 🤷‍♀️♥️